milliyyet.az Azadxeber.az-a istinadən xəbər verir ki, dünən Bakının “Məşhəd Dadaş” məscidində Hacı Şahin Həsənlinin imamətliyi ilə növbəti Cümə namazı baş tutub. İlahiyyatçı söhbətini artıq bir neçə həftədir ki, danışdığı “Hidayət” məfhumu ətrafında davam etdirib: “Allahın hidayət vasitələrindən və önəmli olanlardan biri Qurandır. Quran insan qəlbini cilalayan İlahi bir lütf mənbəyidir. Quran insan daxilindəki həqiqətin söz vasitəsi ilə təcəllasıdır. Elə bu səbəbdən idi ki, Peyğəmbərin (s) Quran tilavəti istənilən insanı məftun edərək haqqa çəkirdi. Quran insanı hidayətin, mərifətin ən ali məqamına qaldırmaq qüdrətinə malikdir. Lakin bizim Qurana düzgün yanaşma münasibətimiz olmayınca onun hidayətindən istifadə edə bilməyəcəyik. İlk növbədə başa düşməliyik ki, əlimizə aldığımız bu İlahi kitabı Allah tərəfindən göndərilmiş dəyərli bir nemətdir. Buradakı hər bir sətir, sözü Allah toplayaraq nazil edib. Bu sətirlər əzəmət sahibi olan Allahındır. Allah onun vasitəsi ilə bizimlə danışaraq bizi hidayət edir.

Quran Ramazan ayında nazil olub. Elə buna görə də Allah bu ay haqqında danışanda ilk növbədə, orucdan da öncə Quran haqqında danışır. Allah bu barədə danışarkən Quranı insanı hidayət edən kitab kimi bizə tanıdır. Elə buna görə də biz düşüncə, qəlb və fikirlərimizi onu ixtiyarına qoymalıyıq. Quran qəlbin həkimi, onu paklayandır. Quran insanı paklayır və pakladıqca da növbəti mərhələyə istiqamətləndirir. Məsumlar (ə) təkid edir ki, hər gün Quran oxuyun ki, Allahla söhbət edəsiz. Bu hidayət üçün ən gözəl vasitədir. Quranla ünsiyyəti olan insanlar hansı mərhələlərə yüksəlməsi təsəvvürə gəlməzdir. Təəssüf ki, bu dəyərli bir kitab əlimizdə olduğu halda biz demək olar ki, ondan istifadə etmirik. Quran bütün ehtiyacları ödəyə biləcək ən ideal vasitədir. Belə olan halda biz dərdlərimizə başqalarının qapısında deyil, Quranın varlığında axtarmalıyıq. Quran başdan-başa şəfadir. Orada hər hansı bir qüsur mümükünsüzdür. Hər sətirini oxuyanda anlayırsan ki, o necə böküm, möhtəşəm bir kitabdır.

Allah Quranda 24 dəfə hidayət kəlməsindən istifadə etmişdir. Hidayətlə Allah insana bu kitabın mahiyyətini anladır. Anladır ki, bu dəyərli kitab sizin nicatınız, xəstəliyinizin çarəsidir. Quranın müxtəlif yürlərində Allah insana bunu bəyan edir. Bəyan edir ki, sənin bütün varlığının kamilliyi Qurandadır. Öy insan övladı özünü Quana təslim et və yüksəl”.

Hidayət mövzusunu gələn Cümə günü davam edəcəyini deyən xətib sonunda dualar oxuyub.